بنلبس وش ونغير ملامحنا . للمبدع . احمد ابراهيم
بنلبس وش ونغير
ملامحنا
بنفرح فرحه ونداري فيها جراحنا
ونضحك ضحكه منحوته
على وشوشنا
مليها الخوف
أنا المخطوف
ومتغمي لكني بشوف
بقول الآه ومش سامع
صدى صوتي
أنا الفرحان ف يوم موتي
أنا المسجون ف اوجاعي
ومتحاصر هنا ف بيتي
وكان نفسي اغنيلك
واغزلك خيوط الشمس
وافرشها على نيلك
أنا كان نفسي اتيمم على ترابك
واسجد سجده ف صلاتي وادعيلك
وتحت سماك اسهرلك
واتغني بمواويلك
أنا كان نفسي أعيش إنسان
على أرضك
واوهب روحي علشانك
فدا عرضك
اشيلك جوه في عيوني
واتحمل في يوم مرضك
ف ليه بتبيعي ف جراحي
وبتاجري ف افراحي
وكرهاني وعارفه ان أنا سندك
أحمد ابراهيم
تعليقات
إرسال تعليق